Poetry Competition Winners

First site in the world to present mushairas on the Web

Home | About Us | Contact | Login

Guest Book
View Sign

To listen to audio clips on this site you need RealPlayer™

Legal Notice

COMPETITION 18

November/December 2006

Misra-e-Tarah: magar sab bazm-e-rindaaN meN tumhaaraa naam lete haiN
Rank	Poet	Pts.	Location
1	Tanwiruddin Ahmad Phool	84	Albany, New York, U.s.a.
2	Zeeshan Akhter Alvi Zeeshan, Zeeshan	82	Rawalpindi, Punjab, Pakistan
3	Syed Hamid Hussain Baaqri Haamidbaaqri	80	Bangalore, Karnataka, India
4	Zafar Sayeed Zafar	78	Allahabad, Uttar Pradesh, India
4	Ateeq Khan Saba	78	Shahjahanpur, Uttar Pradesh, India
4	Zafar Jalil Salfi Jalil	78	Shahjahanpur, U.p., India
4	Waquif Ansari Waquif Ansari	78	Allahabad, Uttar Pradesh, India
8	Yasir Farooq Yasir	74	Karachi, Sindh, Pakistan
9	Syed Kashif Asri	72	Hoffman Estates, Il, Usa
10	Dr. Naim Sahil	70	Allahabad, Uttar Pradesh, India
10	Imtiazulmulk Sultani Aasi Sultani	70	North Karachi,karachi, Sindh, Pakistan
12	Syed Abu Turab Turab	68	Sharjah, Sharjah, United Arab Emirates
12	Mohammad Hidayatulla Fahmi	68	Anantapur, Andhra Pradesh, India
14	Wazir Hassan Wazir	66	Karachi, Sindh, Pakistan
14	Gulrez Ali Khan Gulrez	66	Allahabad, U.p, India
16	Aneela Mahmood Qarar Jafree	50	Karachi, Sindh, Pakistan

Previous winners

#1 — Tanwiruddin Ahmad Phool
mahabbat mein bara rutba woh khush anjaam lete hain
bacha kar yaar ko jo apne sar ilzaam lete hain

kaha ham ne,naheen is mein hai koi dosh us but ka
magar sab bazm-e-rindaan mein tumhara naam lete hain

ham apne roz-o-shab khud hi banaate hain zamaane mein
tira ihsaan kab aie gardish-e-ayyaam lete hain

hamain to rashk aata hai bahut un khush-naseebon par
elawa aam ke jo guthliyon ke daam lete hain

khala ke is samundar mein qamar,khursheed,sayyare
yeh rahte bas safar mein hain,kahaan aaraam lete hain

nazar aaye jahaan mein hain hamain suqraat ke pairo
adu se muskura kar jo ajal ka jaam lete hain

taghaaful ham se karte hain,labon par uzr-e-naadaani
hamaare yaar aksar maslehat se kaam lete hain

sadaqat ko chhupaate hain,khushaamad kaam hai jin ka
ameer-e-shahr se woh loag hi inaam lete hain

yeh maanaa phool mukhlis ho magar kahte hain kuchh hamdam
"gulon se khaar behtar hain jo daaman thaam lete hain"

Back to top

#2 — Zeeshan Akhter Alvi Zeeshan, Zeeshan
labo.n ko see ke mushkil mei.n jo us ka naam letey hei.n
khuda ki rehmato.n ke haath un ko thaam laitey hei.n

kisi ke kaam aatey hei.n kisi se kaam laitey hei.n
yoon insaa.n aik doojey ki madad her gaam letety hei.n

bisaat-e-hashr yeh kis ne ulat di chand lamho.n mei.n
k woh meri khata ka apney sir ilzaam letey hei.n

jo peena jaantey hei.n min'at-e-saaqi nahi.n kartey
jinhei.n peena nahi.n aata woh us se jaam letey hei.n

yeh aakhir koan hai jis ka karam sab pe barabar hai
yeh kis mushkil-kusha ka naam khaas-o-aam letey hei.n

jo dil ki raah chuntey hei.n faqat khushio.n ki hasrat mei.n
woh raahi ibtida mei.n hi gham-e-anjaam letey hei.n

wafa meri nahi.n ghat'ti, talab un ki nahi.n mit'ti
mai.n sub'h-o-shaam deta hoo.n woh sub'h-o-shaam letey hei.n

na-jaaney kab ka tu apney hi haatho.n mit gaya hota
balaayei.n teri hum ae charkh-e-neelifaam letey hei.n

lagey rehtey hei.n jo zeesha.n sada khalqat ki khidmat mei.n
hum aisey un se hi to fusat-e-aaraam letey hei.n

Back to top

#3 — Syed Hamid Hussain Baaqri Haamidbaaqri
dua hathyaaray momin hai dua say kaam letay hai.n
shifa zikray khuda mei.n hai khuda ka naam letay hai.n.

jahaa.n mei.n hum qina'at say hamaysha kaam letay hai.n
khuda ka shukr kartay hai.n khuda ka naam letay hai.n

woh buzdil hai.n jau dartay hai.n yahaa.n hardam balaao.n say
bahaadur sabr ka aisay mei.n daaman thaam letay hai.n

jau momin hai.n woh chaltay hai.n mohammed(s.a.w.)ki shariat per
munaafiq naamay paighamber(s.a.w) baraaye naam letay hai.n

faraybee taajiro.n ki dausto yeh bhi nishaani hai
woh acchay maal kau bhi kaudiyo.n kay daam letay hai.n

baday chaalaak hai.n dekho hamaaray daur kay taajir
khuda ka naam lekar bhi dagha say kaam letay hai.n

yaqee.n humko hai haamid tum kabhie ma'ye pee nahi.n saktay
magar sab bazmay rindaa.n mei.n tumhaara naam letay hai.n

Back to top

#4 — Zafar Sayeed Zafar
jo rahe zindagi mein haq ka daman thaam lete hain
wahi khaliq se apni zeest ka inaam lete hain

chukao uski qeemat kaam jaisa chahte ho lo
ye rehbar aaj-kal k rahbari ka daam lete hain

go kaam aata hai ghairon-k buland ekhlaq wala hai
to baad-az-marg loag uska adab-se naam lete hain

wo rahe haq pe chalte hain bhale pechida hon rahen
jo quraa'n our hadison se faqat aalaam lete hain

bhale saaqi ne gumnami mein tumko daal rakkha ho
magar sab bazm-e-rindaan mein tumahara naam lete hain

jahaan maqtool ki mitti ko dafnane ke lale hain
whain qatil jo hain inaam aur ikraam lete hain

jo chauda sao baras pahle arab main phoot kar nikla
usi chashme se har ek faiz khaaso aam lete hain

khuda ke wo pasandida bahot hote hain bande sab
jo ahmad ki mohabbat ka hamesha jaam lete hain

wo seena cheer kar tofan ka kashti paar hain karte
"zafar" jo azm-o-himmat se bhanwar mein kaam lete hain.

Back to top

#4 — Ateeq Khan Saba
kabhi maikhane jakar hum jo koi jaam lete hain
to ghabrakar gham-e-dauraan kaleja thaam lete hain.

mohabbat mein faqat aankhon se hi hum kaam lete hain
kabhi paighaam dete hain , kabhi paighaam lete hain.

khushamad, chaaploosi mein maharat jinko hasil hai
wohi aizaaz pate hain , wohi inaam lete hain

gawarah kaise ho sakti hai humko unki ruswaayee
khata karte hain woh , hum apne sar ilzaam lete hain

khuda jaane moharrik kaun hai tark-e-mohabbat ka
main unka naam leta hoon, woh mera naam lete hai

naya ilzaam phir koi mere sar lagne wala hai
laraz jaata hoon main jab dost mera naam lete hain

wafon ka sila yun chahte hain log duniya mein
ki taajir jis tarah se maal dekar daam lete hain

tamanna bhi hai manzil par "saba" jaldi pahunchne ki
magar araam bhi ruk ruk ke woh har gaam lete hain

Back to top

#4 — Zafar Jalil Salfi Jalil
samajh se, hoshmandi se yahan jo kaam lete hain
woh is duniya mein dilchaspi baraye naam lete hain

qadam yeh ladkhadayen hoke kuch mayus, is se qabl
mujhe badhkar mere pukhta iraade thaam lete hain

amal karte nahin, ungli uthaate hain zamane par
bhatakte khud hain, naam-e-gardish-e-aiyaam lete hain

zamin par chand ki surat chamakte hain wohi, loha
andheron tum se jo misle chiragh-e-shaam lete hain

tamanna hai jafaon par pasheman hon na woh apni
wafaon ka kahin ahl - e - wafa innam lete hain

achanak yaad unhen kyun aa gaya tu, dekhna yeh hai
woh ab kya kaam tujh se ae dil - e - nakaam lete hain

khirad ki rahbari karne pe qadir hai junun mera
woh honge aur jo hathon mein paththar thaam lete hain

jo hon ashaar wazeh, theek hai lekin "jalil " aksar
unhen hum karke mubham lazzat-e-ibhaam lete hain

Back to top

#4 — Waquif Ansari Waquif Ansari
sare maikhana jo tishna labi se kaam lete hain
adab ke saath ahle zarf unkaa naam lete hain

makaan se laamakaan tak hai unheen ke ishq ka charcha
malaik hain ke jinka naam subh-o-shaam lete hain

koi shikwa kare bhi kyun hamaari faaqa masti ka
qalandar hain nizaam-e-ishq se har kaam lete hain

unheen ke paaon par mar mitti hain shaazish ki zanjeerein
jo aage badh ke aazaadi ka parcham thaam lete hain

hamaari aabla payee raqam hai dasht-o-sahra par
hamaara naam to sab sarmad-o-gulfaam lete hain

hum aise barg-e-gul hain pattharon ko kaat sakte hain
hamaara taur wo lekin bataur auhaam lete hain

jo raahe zulm main parwarda-e-murda zameeri hai
yazeed-e-ahde haazir se wahi in.aam lete hain

unhein to aish-o-ishrat se kabhi fursat nahin milti
awamulnaas ki sudh budh kahan hukkaam lete hain

faza qaayam ho amn-o-aasti ka is liye az khud
hum apne sar har ik tohmat har ik ilzaam lete hain

ye zaahir hone waala hai muzaffar kaun hai "waquif"
modabbir sab naqeeb-e-waqt se paighaam lete hain

Back to top

#8 — Yasir Farooq Yasir
thakan jab berhne lagti hai to kuch aaraam lete hain
safar main teri yadoon k chahlak'te jaam lete hain

ye apni kam-naseebi hai k kotahi nigahoon ki
jahan subhain bhi milti hain wahan se shaam lete hain

sada-e-dilnasheen sun ker sama?at jaag uthti hai
tere qur?an k qaari diloon ko thaam lete hain

bahek jaate hain ger insaan to aansoo behne lagtey hain
mager beh?kaane wale tauba ka kab naam lete hain

khuda ko yaad kerne ka takalluf koun kerta hai
gunah k waqt hum aasi gunah ka naam lete hain

ager shaamil na hoon jazbaat aansoo hain faqat paani
wagerna motiyoun ko kab yahan bay-daam lete hain

aziyyat gahoon ka sardaar, ye hai guantanamo
yahan rug rug sitam ker k khushi k jaam lete hain

barahna kerna maqsad tha nikalwana tha jannat se
so shetaan be-libaasi se abhi tak kaam lete hain

siyasat main talash-e-wahdat-e-maani hai laa-haasil
jo oujhal rehta hai nazroon se wo peghaam lete hain

ghazal-dunaya main aa jaate hain dil ki baat kehne ko
ye mat samjho k hum hissa bara-e-naam lete hain

Back to top

#9 — Syed Kashif Asri
tumharay zikr say baysakhion kaa kaam lete hain
yeh dil jab larkhaarata hai tuu isskoo thaam lete hain

wafa kar kay bhee hum nay kuch nahi manag kabhi un say
who apni baywafai kay bhee hum sya daam lete hain

gaawara hee nahi kartay who mujh say baat karna per
sar-e-mehfil meray hatoon say barh kay jam lete hain

hum ashiq hain humaya terkay mai bas ahain hee milti hain
adayen joo bhee hoti hain who sab gulfam lete hain

tera ashiq hoon per koi mukhatib hee nahi karta
magar sab bazm-e-rindaan men tumhaaraa naam lete hain

teri chahat kisay mil payee hai yadain hee kafi hain
yehi hum koo buhat hai hum yehi eenam lete hain

Back to top

#10 — Dr. Naim Sahil
hamare mulk men dahqaan jab bhi vaam lete hain,
muqaddar men vo apne gardish-e-ayyaam lete hain.

ye duniyan unko diwana samajhti hai haqiqat men,
muhabbat ka jo apne sar har ek ilzaam lete hain.

mahaaze-e-jung se dushman ki faujen bhaag jaati hain,
iradon men jab apne hum bhi istehkaam lete hain.

hamari be-niyazi par zamana fakhr karta hai,
hum apne kaam ke badle men kab inaam lete hain.

palat jaati hai jab kashti talatum khez maujon se,
samundar men hum apne bazuon se kaam lete hain.

har ik jaanib se aati hai sada allah-o-akbar ki,
mujahid haath men jab parcham-e-islam lete hain.

haqiqat dekh lete hain vo maazi ke darichon se,
ghazal men jab kabhi vo shorish-e-hangaam lete hain.

tumhare chaand se chehre pe noor-e-paarsai hai,
magar sab bazm-e-rindan men tumhara naam lete hain.

hamari sar-balandi unko raas aati nahin ?sahil?
hamara naam aksar hasid-o-nammaam lete hain.

Back to top

#10 — Imtiazulmulk Sultani Aasi Sultani
ajab deewaanapan hai,ab to tasht az baam lete hain
tumhara naam aiesa hai ke subh-o-shaam lete hain

kisi ne dil churaya hai mira so maikade punhcha
magar sab bazm-e-rindaan mein tumhara naam lete hain

nashey mein doob jaate hain hamaisha daikh kar un ko
ham un ke haath se peene ko jab bhi jaam lete hain

bari maasoomiyat pinhaan hai chaalaaki mein bachchon ki
yeh apna kaam karne ka bhi kuchh in'aam lete hain

nashaib-e-waqt mein paiham buzurgon ko hamaare haan
jo un ke dast-o-baazoo hain woh barh kar thaam lete hain

jinhain ghussa bahut aata hai un se door hai dunya
khirad wale muhabbat se hamaisha kaam lete hain

usi ne khwaab mein aa kar sada neendain ujaari hain
ham apne sar hamaisha yeh haseen ilzaam lete hain

duaaein bai-asar is waaste hoti hain ab aasi
bahut se paishwa is kaam ke bhi daam lete hain

Back to top

#12 — Syed Abu Turab Turab
dum e rahat jo daaman sarkashi ka thaam leten hain
wohi phir gardish e dauran mein rab ka naam leten hain

agar haqgoee hai ek jurm duniya ki nigahon mein
to hum apni khushi se apne sar ilzam leten hain

dayar e zulm mein jeena ganwara hi nahin hota
sukoon ki saans ahl e haq ta'e samsaam leten hain

yeh hai maikhana e qudrat kami is mein nahin, lekin
ba qadr e zarfiat maikhar apna jaam leten hain

karen kya lutf hi kuch aisa us ke tazkere mein hai
ke jab se bolna seekha usi ka naam leten hain

suni thi sirf dil ki, thokrein khai zamane ki
to ab humrah dil ke aql se hum kaam leten hain

zameen e shaer mein fasl e ghazal ke gul khile aise
ke log ab naam mera bhi sar e gulfam leten hain

mashaqqat kar ke duniya se jo ponhche bazm e mehshar mein
kaha ab meer e mehfil se chalo in'aam leten hain

Back to top

#12 — Mohammad Hidayatulla Fahmi
woh dhaane qah'r jab angdaayiyon se kaam lethe hain
tho ham dasth-e-dua se saara aalam thaam lethe hain

siyaahee kab rubaayee ke liye qayyaam lethe hain
suraahi-daar gar'dan se ma'y-e-gulfaam lethe hain

hawaa ke gudgudaane par agar woh hans paden shab men
sithaare jhilmilaana chod kar dil thaam lethe hain

adaay-e-kaj-ravee unki hai marg-e-nagahaan laikin
maseehaayee ka zer-e-lab hansee se kaam lethe hain

iraade zindagee ki dhoop men jab toot jaathe hain
ghanee zulfon ki chaawon men zaraa aaraam lethe hain

shikastha jaam hai apnaa shikastha dil naheen saaqi
khumaar aalud aankhon se nasheela jaam lethe hain

udaasee, gham, khushee, muskaan,aansu, den qismath ki
"magar sab bazm-e-zindaan men tumhaara naam lethe hain"

banaawat dekh kar dilkash, haseen, ma'soom cheh're ki
qasam hai dah'riye bhi us khudaa ka naam lethe hain

masaaib zindagee bhar ke tho unki den hain "fahmi"
a'zal se, aadami hi apne sar, ilzaam lethe hain

Back to top

#14 — Wazir Hassan Wazir
kabi to subha lete he.n kabhi shaam lete he.n
nirale dhung se us bewafa ka naam lete he.n

jinhe peene pilaane ka salika tak nahi aata
wahi naadan ab hatho.n me.n apney jaam lete he.n

brah-e-rast jinse rabta na aashnai hai
unhi logon se hum ash"ar pe in"am lete he.n

halakatkhez gulshan se nikal jane ki haarat hai
mager pholo.n ke aanso he.n jo daman thaam lete he.n

wahi to log apne waqt ke suqraat bante he.n
jo taro.n ki chamak se roshni ka kaam lete he.n

yahi farzangi me.n ab wateera humne apnaya
kare woh bewafai ser pe hum ilzaam lete he.n

kisi bhi waqt aajae.ngay baam-wo-der kula rukhna
yahi to naama ber se roz hum peghaam lete he.n

na tum saqi na mekhwaroo.n se nisbat hai tumhe koi
magar sab bazm-e-rindaa.n me.n tumhaaraa naam lete he.n

wazir ya aa hi jaey.nge khud apny daam me.n aakhir
parindo.n ko jo ya sayyaad zeer-e-daam lete he.n

Back to top

#14 — Gulrez Ali Khan Gulrez
maza tashna dahani ka jo tashnakaam lete hain.
unhi k naam ki hichki hazaro'n jaam lete hain.

nazar ko maiqada kah kar labo se jaam lete hain.
ghazal men zulf-e-jana ko bajaye-laam lete hain.

bhanwar ki zad men rahkar hausala khote nahi apna,
jo mauje sar patakti hain unhi ko thaam lete hain.

hazaro'n hasraten dil ki bhala kaise kare poori,
k ham saanse bhi duniya men baraye-naam lete hain.

wo hasil karke qurbat qurb ki lazzat nahi samjha,
jo lazzat door rahkar aashiq-e-nakaam lete hain.

sahara bante rahte hain jo har lachar-o-bekas ka,
maza wo zindagi ka har nafas har gaam lete hain.

ta'assub ki hawa chalti hai jab barbaad karne ko,
zamane wale hamse amn ka paigaam lete hain.

har ek kirdaar ki takhleeq hai us shaks k dam se,
sabaq gulzaar men "gulrez" se gulfaam lete hain.

(takaddus maiqade ka yoon to hai "gulrez" se kayam,
magar sab bazm-e-rindaan men tumhaaraa naam lete hain).

Back to top

#16 — Aneela Mahmood Qarar Jafree
mitanay ko teira ghum hi faqat hum jaam lete hain
magar sab bazm-e-rindaan men tumhaaraa naam lete hain

bichar jao bichara hai tumhay ye bhi ijazat hai
tumharay waastey hum apnay sar ilzaam lete hain

khuda ma'afi gunah hei ye magar aie hazrat-e-wa'ez
kabhi yun aap bhi to maslehat se kaam lete hain

ridai-e-saani-e-zehra se hai islaam ka pardah
unhy deikho magar jo majlison k daam lete hain

faqat iss naam sey wabasta jaaan-o-dil ka qaraar
wo aik naam jo hum subuh o shaam lete hain

Back to top