Audio Poets Latest Addition Humorous

Non Audio Prominent Poets Readers' Poetry Poetry Competition Become a Member

Essays / Papers History of Ghazal Roman Urdu

In Your Area Mushaira Schedule Reports Organizations

News & Articles

Awards

Links

FAQs

Contribution

Credits

Guest Book
View  Sign

To listen to audio clips on this site you need RealPlayer™

Copyright © 1998-2007
Mehfil-e-Mushaira
All Rights Reserved
 
No part of this site may be reproduced without permission

Legal Notice

COMPETITION 19   January/February 2007

Misra-e-Tarah: naSeehat kee naSeehat hai tamaashe kaa tamaashaa hai Rank Poet Pts. Location 1 Yasir Farooq Yasir 82 Karachi, Sindh, Pakistan 2 Aamir Abbas Aamir 80 Karachi, Sindh, Pakistan 3 Tanwiruddin Ahmad Phool 78 Albany, New York, U.s.a. 3 Syed Abu Turab Turab 78 Sharjah, Sharjah, United Arab Emirates 3 Syed Shiraz Mahdi Zia 78 Dhahran, Sharqiyyah, Saudi Arabia 3 Ateeq Khan Saba 78 Shahjahanpur, Uttar Pradesh, India 7 Mohammad Hidayatulla Fahmi 76 Anantapur, Andhra Pradesh, India 7 Wazir Hassan Wazir 76 Karachi, Sindh, Pakistan 9 Syed Hamid Hussain Baaqri Haamidbaaqri 74 Bangalore, Karnataka, India 9 Zafar Saeed Jeelani Zafar 74 Allahabad, Uttar Pardesh, India 11 Najeeb Reza Najeeb 72 Allahabad, U.p, India 12 Gulrez Khan Gulrez 70 Allahabad, U.p, India 12 Khalid Hafeez Khalid 70 Allahabad, Uttar Pradesh, India 14 Suneel Danish 68 Allahabad, Uttar Pradesh, India

#1 — Yasir Farooq Yasir udher dil ki azaanain hain , bulaawe per bulaawaa hai idher hai khaawb ka aalam, iraade per iraadaa hai ye sab ki aarzoo hai zindagi sersabz ho jaaey mager khushyoun ka sauda bhi kabhi bedaam aayaa hai? tumhaare betarah bikhre howe baaloon ka kehnaa hai kisi ki muntashir zulfoon ko tum ne jaa sanwaaraa hai * wo jaado ehl-e-babul ko sikhana do farishtoon kaa naseehat ki naseehat hai tamashe ka tamashaa hai na ho naazuk to phir kiya ho? haseen hatoon ne qudrat ke chupaa ke dil ko seene main bare naazoon se paalaa hai meri baatoon ka rukh wo moor dete hain saleeqe se unhain apne dukhoon ka tazkira bhi kab gawaaraa hai gilaa kerte nahien ghairoon se ae doost apne loogoon kaa nazar makkaar hai un ki tera hi ghar nishaanaa hai * bacha paey na qaum-e-loot ko akhir khalilullah shifa’at be-asar thehri khudaa ka hukm aayaa hai zaroorat peda kerta hai hawas ka kaarkhana hai fun-e-tash’heer khawbeeda tamannaain jagaataa hai isi ummeed per main de raha hoon dastakain yasir sada qadmoon ki aane waali hai, der khulne waalaa hai * do farishte haroot aur maroot , khuda k hukm se babul waloon ko aazmaish k taur per jadoo sikhate they. saath saath wo unhain tambeeh bhi kerte they k wo un k liye aik aazmaaish hain. * hazrat ibrahim ne quam-e-loot ko azaab main mubtalaa na kerne ki safarish ki jo rad ker di gae.

  Back to top

#2 — Aamir Abbas Aamir ibaadat mere dil ki, ishq, tere sar ka sauda hai mere dil ka suwaida hai, tere maathe ki bindiya hai zara bachna, sambhalna, raasta yeh jaan-leva hai mohabbat ke jo da'we-daar hain yeh un ka kehna hai sar e mehfil mujhe ulfat ki raahon se daraate ho naseehat ki naseehat hai, tamaashe ka tamaasha hai mere zulmat-kade mein teri yaadein jashn karti hain sarashk-aalud sham'a ka jo haasil hai, ujaala hai sataayish teri subh o shaam rehti hai mere lab par koyi to baat hai jo dil teri yaadon mein khoya hai woh kehte hain keh mera haath dil se kyun nahin hatta mere haathon ki rekhaaon peh tera naam likha hai kahaan maqdoor aamir is sukhan ko keh sakun apna haqeeqat mein yeh amr e kun tere lab ka ishaara hai

  Back to top

#3 — Tanwiruddin Ahmad Phool woh gaisu kaale baadal hain,woh chehraa chaand jaisaa hai woh paikar dilrubaa hai,keyaa haseen us kaa saraapaa hai! nikalnaa khuld se aadam ka laghzish ke nateeje mein naseehat ki naseehat hai tamaashe kaa tamaashaa hai kahaan se aaye dunyaa mein? kahaan jaanaa hai phir ham ko? na ham khud ko samajh paaye,ajab qissaa hamaaraa hai takabbur tum na karnaa,baat koi mat bari kahnaa takabbur ne hi shaitaan ko bari pasti mein phainkaa hai haqeeqat hai baraa maasoom hotaa hai har ik bachchaa samajh lo tum buri suhbat se hi insaan bhataktaa hai naheen ho naakhudaa jin kaa to hotaa hai khudaa un kaa sahaare se jo hon mahroom woh un kaa sahaaraa hai woh ham ko bai-wafaa samjhaa,ham us ko bai-wafaa samjhe zamaane se anokhaa apni ulfat ka fasaanaa hai mahabbat hi mahabbat ho,jahaan se door nafrat ho mahabbat jo kare sab se, wohi insaan achchhaa hai tri nazmon,tre ashaar kaa aie phool majmooaa yeh hai maamoor ulfat se,mahabbat kaa saheefaa hai

  Back to top

#3 — Syed Abu Turab Turab bhanwar ka khauf hai mujhko na toofanon ka dhadka hai yaqeen allah par hai aur dua ka bhi saleeqa hai jo itna janta hai kya mohabbat ka taqaza hai woh apna haq jatae bin faraiz poore karta hai bhala firauniat ka zeher peene waale kya jaane sharaab-e-bandagi-e-rabb-e-akbar ka maza kya hai na jaane kya hua allah o akbar kehne walon ko ke ek shaitaan ki dhamki se unka dil larazta hai musalsal maujiza hai karbala ka aek ek pehloo koi jee kar bhi murda tha koi mar kar bhi zinda hai na bhatko falsafon ke jungalon mein kuch nahin haasil basad ikhlas ek sajda charaagh-e-haq jalaata hai woh talkheen sabr ki karke meri haalat pe hanstey hain naseehat ki naseehat hai tamashe ka tamaasha hai guzar hota hai jab mera kabhi maazi ki galiyon se turab us dam mera bachpan muhjhe aawaz deta hai.

  Back to top

#3 — Syed Shiraz Mahdi Zia azaaem jiskay pukhtaa thay , wo toofaanon say uththaa hai kamee himmat ki jismain thee wo kashtee main hee doobaa hai jo saahil par hee rehtaa hai wo daryaa kyaa samajhtaa hai na samjhay rehkay andar hum ye aakhir kitnaa gehraa hai khyaal apnaa muqayyad hai anaa kay qaid khaanay main siwaa meray nigaahon main har ek insaan chotaa hai ye khaamoshi naheen logo samaa'at kee hai kotaahi dar-e-dil par jo dastak ho rahee hai kaun suntaa hai hamaari phoonk se khursheed bujhtay thay magar ab to hamaari jaan jaati hai diyaa gar timtimaata hai main kyaa janoon zia saahab ke aakhir shaayeri kyaa hai meree dewaani baaton ko zamaana sher kehtaa hai.

  Back to top

#3 — Ateeq Khan Saba koii sahra mein ja phuncha, koii bun bun bhatakta hai woh deewana hua jis ne tujhe ek baar dekha hai nahin ahsaas kuchh iska koii janmon ka pyasa hai jo hain sairaab pahle se wahin baadal barasta hai tere aane ki ummeedon se shub bhar to chamakta hai sahar hote hi armaanon ka suraj doob jata hai juda karde ga ab koii na koii shaakh se mujh ko yeh andesha hai dil mein phool phir bhi muskuraata hai sunami, zalzale, sailaab kyun aate hain duniya mein khuda rehmaan hai, socho, to phir kyun qahr dhata hai badal leti hai apna raasta har ek khushi lekin ghamon ka qafla seedhe mere ghar tak phunchta hai andheron mein bhi rasta dhoond leta hai koii apna "saba" lekin koii din ke ujaalon mein bhatakta hai

  Back to top

#7 — Mohammad Hidayatulla Fahmi jawaan hai chaudhaveen ki shab, nazar men unka jal'wa hai hamaare sar men ab, saudaa-e-dunyaa hai na uq'baa hai hain mothee aankh men , lab par tabassum ka khazaana hai hamaari zindagee bhar ka, mohabbat hi asaasa hai zaraa si cho't lagthi hai tho chik'naa-choor hotha hai hamaara ye dil-e-naazuk bhi sheeshe ka khilona hai hamen ma'loom hai unke hai dil men kyaa, nazar men kya hamaara tarjumaan-e-mudduaa-e-dil ye chehra hai wo taare dekhnaa shab bhar,kab unki maang men bhar len mohabbat karne waale dil ka bas itnaa fasaana hai hamaare dil ko chal'ni kar rahe hain tan'z ke nash'tar ke unki mus'kuraahat men banaawat bhi ziyaada hai ham unke dar se kyaa nikle, puraane zakh'm yaad aaye nazar hai khul'd par, rukthe hain pa, dil baith jatha hai hamaare khat ko dil kahnaa, jalaana phir bujhaa dena "naseehat ki naseehat hai, tamaashe ka tamaasha hai" samajh'te they hamaare dil men taaqat do jahaan ki hai sanam ke haath men laikin,hamaara dil khilona hai hamaara sar wo sar hai, kat hi jaaye jhuk nahin saktha mohabbat men magar "fahmi" hamaara sar bhi jhuk'tha hai

  Back to top

#7 — Wazir Hassan Wazir teri yaado.n ki shamm"a se mere dil me.n ujaala hai tujhe ger bhool jaao.n me.n andhera hi andhera hai ager dekho.n to us me.n aks tera hi ubherta hai niraale dhung ka jo aayena me.n ne tarasha hai who jis ke jaber ke saaey me.n dunya saans leti hai usi ke naam ka ab sare akhbaro.n me.n charcha hai judaai deke who kehta hai usko bhool jaao.n me.n bataao kia mohabbat me.n kabhi aisa bhi hota hai? jise me.n dekhta ho.n chahata hoon pyar kerta ho.n marowwat uski aankho.n me.n na dil uska kushada hai usi soraj se ab to roshni milti nahi yaaro.n bohot se chand ke badle jo ek soraj nikala hai tahaffoz naam de ker aag ke sho"le who barsaey ajab andaz se insaaniat pe zolm dhana hai mohabbat hi zamane me.n nirala khel hai jis me.n naseehat kee naseehat hai tamaashe kaa tamaashaa hai wazir ab aaphansey he.n aan ker aise jazeerey me.n nikalne ki koi sorat na ab jane ka rusta hai

  Back to top

#9 — Syed Hamid Hussain Baaqri Haamidbaaqri hamaara rab yeh kehta hai keh bolo kya tumhaara hai zameeno.n aasmaano.n mei.n jau hai woh sab hamaara hai musalsal ek nayee makhlooq kau hum khalq kartay hai.n hamaaray aagay har banday nay apna sar jhukaaya hai tumhaari neend tau kya oongh bhi humko nahi.n aati yeh sab bando.n ki raahat kayliye humnay banaaya hai nazar apni uthaao ghaur say dekho har ek shaye ko keh harakat mei.n hai har zarra munazzam dahr saara hai tumhaari dars gaahe.n aisee ho.n keh laug keh utthe.n "naseehat kee naseehat hai tamaashay ka tamaasha hai" kabhie mat bhoolna haamid mohammed(sawaw)ki shariat ko sahaaray say isee kay khud ko insaa.n nay sanwaara hai

  Back to top

#9 — Zafar Saeed Jeelani Zafar suna thukra ke takht-o-taj ko befikr rahta hai wo jiske haathon mein kamli phati haathon mein kasa hai saja kar mat isay rakkho padho samjho amal mein lo ye quraan hai jo ahkam-e-ilahi ka khulasa hai larazti hai moqaddas muskurahat maan ke hoton par kisi bachche ka jab pehla sipara khatm hota hai hamare rehbaron ko bhook rahti hai huqumat kee hamare aalimon ke haath mein maslak ka jhanda hai diya firaon ke jadugaron ko maat eisa ne naseehat kee naseehat hai tamaashe ka tamaashaa hai chaman ko wo bana kar us mein bhar deta hai raanayi gulon ko wo banata hai unhein khusboo bhi deta hai bikaoo ho gayin insaan kee jab khoobiyan saari to phir batlao kiska kispe ktna ab bharosa hai khuda napasandeeda wo hota hai "zafar" us dam zubaan ko jab kabhi apni koi chaaku banata hai

  Back to top

#11 — Najeeb Reza Najeeb ajab hai daastan dil kee chalan iska ye kaisa hai usi ko yaad karta hai jise dil se bhulana hai kitaab-e-jeest par iflaas kee deemak ka kabza hai jo chehra chaand jaisa tha wahan chechak ka dhabba hai hamare aur tumhare beech jo rishta hai kaisa hai na ye sab hamne socha hai na ye sab usne socha hai musibat ranj aafat haadsa zulm-o-sitam aahen, dil-e-hasrat zada ab to bata de khail ye kya hai nahi rah kar bhi rahti hai ta-aalluk cheez hai aisee, hawa ka rukh badalne se kahin saaya badalta hai jinhe aapas mein ham dono badalte rahte then yuhin, abhi tak un kitabon par tumhara naam likkha hai khilaunon ke liye bachche abhi tak jaagte hone, tujhe aiy muflisi koi bahana dhoond lena hai bahut din ho gaye tumne pukara tha mujhe lekin, abhi tak dil ka darwaza usi dastak se hilta hai hami bhoole nahi achchey burrey din aaj tak warna, najeeb is daur mein cheezen purani kaun rakhta hai

  Back to top

#12 — Gulrez Khan Gulrez sar-e-toor-e-tamannaa husn-e-jaana jalwa aara hai naseehat kee naseehat hai tamaashe kaa tamaashaa hai jise chaahe wo izzat de jise chaahe kare ruswaa, wahi maazool karta hai wahi afzal banataa hai masarrat k chamakte surajon k qurb kee khaatir, hazaron meel tak phaile andheron se guzarna hai hamare zauk-e-nazzaaraa k hain ye waswase aiy dil, na chehre mein hai aainaa na aaine mein chehra hai kabhi jab aag lagti hai kahin phoolon kee basti mein, mujhe uljhan mein shauk-e-baagbaanee daal deta hai kabhi shabnam,kabhi shola,kabhi jugnu,kabhi dariya, hazaaron rang mere paon kaa chhalaa badaltaa hai kisi surat bhi sik chukti nahi ye chaand kee roti, na jaane kab se baithaa munh koi bhooka chalaataa hai kabhi us baap kee ghurbat kaa andaazaa kare koi, tasauwur mein jo apni beti kee doli sajaata hai bahut mohtaat hai fitrat rah-e-taareekh saazee mein, kayee sadiyan guzar jati hain tab ik pal banaata hai muqabil aap k "gulrez" dast-e-karbala hoga, khilaaf-e-zulm kuch kahne se pehle ye bhi sochaa hai

  Back to top

#12 — Khalid Hafeez Khalid koi sehra mein apni tishnagi lekar bhatakta hai koi aaidi ragadta hai to chashma phoot jata hai wo har shab apne kamre ko baharon se sajata hai savera hone par kamre ka guldasta badalta hai kisi din rakh diye the hoth apne maa ne bachpan mein mai boodha ho raha hoon phir bhi ye chehra chamakta hai hame bachchon ka mustakbil liye phirta hai sadkon par nahi to garmiyon mein kab koi ghar se nikalta hai abhi maujood hai is gaon kee mitti mein khuddari abhi bewa kee gairat se mahajan haar jata hai jab us se guftgu kar li to phir shajra nahi poochha hunar bakhiyagari ka aik turpayi mein khulta hai kisi bebas ko rote dekh kar hasna nahi "khalid" ye wo aansoo hain jinse takht-e-sultani palatta hai

  Back to top

#14 — Suneel Danish safar hai tishnagi ka aur lakodak aik sehra hai na sar par koi saya aur na rahon mein dariya hai lahu ke daag dhokar ho gaye masoom fitrat sab ke jaise meri basti mein har ik insan farishta hai samaya hai dimago-dil mein mere is tarah se wo nazar aata mujhe wo har taraf uska hi chehra hai ye duniya phir bhi usko misr ka bazaar kahti hai hamare shehr mein yusuf hai na koi zulaikha hai khuda ne husn ki daulat usey ki hai ata aaisi fakat "danish" hi kya sab ne likha uska qasida hai

  Back to top

Previous Winners

Copyright © 1998-2007. Mehfil-e-Mushaira. All rights reserved.