Audio Poets Latest Addition Humorous

Non Audio Prominent Poets Readers' Poetry Poetry Competition Become a Member

Essays / Papers History of Ghazal Roman Urdu

In Your Area Mushaira Schedule Reports Organizations

News & Articles

Awards

Links

FAQs

Contribution

Credits

Guest Book
View  Sign

To listen to audio clips on this site you need RealPlayer™

Copyright © 1998-2007
Mehfil-e-Mushaira
All Rights Reserved
 
No part of this site may be reproduced without permission

Legal Notice

COMPETITION 6   March 2005

Misra-e-Tarah: un se Allah bachaaYe jo wafaa karte haiN Rank Poet Pts. Location 1 Ateeq Khan Saba 72 Shahjahanpur, Uttar Pradesh, India 2 Mohd. Azeem Shajahanpuri 70 Shahjahanpur, Uttar Pradesh, India 2 Zafariqbal Syed Amar 70 Sharjah, United Arab Emirates 4 Sajid Hashmi Sajid 68 Rajgarh (biaora), MP, India 5 Muhammad Aslam Fareedi 64 Karachi, Sind, Pakistan 5 Riaz Ahmed Saraa 64 Lahore, Punjab, Pakistan 7 Tanwiruddin Ahmad Phool 62 Karachi, Sind, Pakistan 8 Muhammad Usman Qaiser 58 Karachi, Sind, Pakistan 9 Yasir Farooq Yasir 56 Karachi, Sind, Pakistan 10 Jhony Penta Tashna Ahmedabadi 48 Kinshasa, Kin, Democratic Republic of Congo 11 Shehzad Hanif 40 Multan, Punjab, Pakistan

#1 — Ateeq Khan Saba Dekh kar zulm jo khamosh raha karte hain Woh to zalim ke tarafdaar hua karte hain Tum jagah dil mein na dena kisi khush fahmi ko Woh to har ek se yunhi hans ke mila karte hain Aadmi hone ka bhi hum ko bharam rakhna hai Is liye deeda - o - daanista khata karte hain Zindagi tu ne kabhi dii thi khushi ek pal ki Aaj ashkon se wohi qarz ada karte hain Tod dete hain jo khud apna har ek ahd-e-wafa Bewafaayee ka woh duniya ki gila karte hain Tung - haali hai faqat saahib-e-eemaaN ke liye Beche baithe hain jo eemaan, maza karte hain Kuchh chiraagh aaj bhi roshan hain mohabbat ke 'saba' Ab bhi kuchh log zamaane mein wafa karte hain

  Back to top

#2 — Mohd. Azeem Shajahanpuri Jis ke chehre pe kayee chehre hua karte hain Aise har shakhs se hum door raha karte hain Chhaon mein baitho magar soch samajh kar baitho Aaj kal ped bhi zahreele hua karte hain Dost to dost hai dusman bhi jo ghar aajaaye Kanda peshani se hum us se mila karte hain Doosron ke bhi jo dukh baant liya karte the Ab bhala aise kahaan log hua karte hain Tum ko raas aagaya badle huye mausam ka mizaaj Is liye aaj se hum tark -e- wafa karte hain

  Back to top

#2 — Zafariqbal Syed Amar waqt khamoosh hai, lamhaat sada karte haiN aur kalmaat sama’at say gila karty haiN tangdasti main to aisay hi jia karte haiN ladawa hota hai jab marz dawa karte haiN jaan di kaisay judai main tarap kar main nay mera qissa wo basad shauq suna karte haiN haal aisa kia yarooN ki masihai nay ab to dushman bhi mere haq main dua karte haiN kasmpursi main hi bandon ko khuda yaad aaye khush naseebon ko hi dukh dard mila karte haiN peet’tay rehtay haiN apna hi dhandora har dam “un se Allah bachaaYe jo wafaa karte haiN” gardish-e-dehr hawadis say laraz jati hai jheel main dairay kankar say bana karte haiN mas’ala hum nay uthaya hai unhi ki zid par dekhiay kehte haiN kia aur who kia karte haiN zulm kay agay jhukay sar haiN sabhi kay kab say uth kay kat jaiN jo sar, kaisay hua karte haiN? kehte rehte haiN ke yeh karna hai wo karna hai kuch naheeN karte :amar:, wo jo kaha karte haiN

  Back to top

#4 — Sajid Hashmi Sajid Dil ko behla ke sada torh diya karte hein Husn wale bhi saleeqe se jafa karte hein Aik wo hein jo hamesha se sitamgar thehre Aik hum hein jo bhalaee ki dua karte hein Apne kirdaar ki mehkaar sada rehtee hai Gul me khushboo ke to kuchh roz hua karte hein Chorh ker meri ana aur sabhi kuchh le lo Aaj ham zeest ka qarzaa bhi ada karte hein Naqsh ker sakte hein qadmo ke nisha pani per Moajaze aise mohammad ke gada karte hein Tum nazer aao na aao hai tumhari marzee Dil ki aankhon se tumhe dekh liya karte hein Aaj ke daur me kuchh dost hein aise sajid Zulm mujh per jo raqeebon se siwa karte hein

  Back to top

#5 — Muhammad Aslam Fareedi Dopahar main bhi meray sath chala kartay hain Meray saye hain baherhaal wafa kartay hain Dekhtahoon sar-e-gulzar-e-tamanna un ko Neend ki raah main jab khab saja kartay hain Keya khabar thi ke meri rooh main basjayen gay Wo farishtay jo sar-e-raah mila kartay hain Herf-e-dilkash say sajaatay hain daro bam-e-kheyal Wo jo sheron main tera naam likha kartay hain Meri raahon main jala rakhhay hain khushboo kay chraagh Kaun hain wo jo meray haq main dua kartay hain Hasratain le kay main lautoonga sar-e-kucha-e-jaan Wo darichay say mujhay roz takaa kartay hain Shahr-e-hasti say Fareedi ye sadaa aati hai Aisay insaan say bachiye jo bura kartay hain

  Back to top

#5 — Riaz Ahmed Saraa kaNda rooi se hilahil woh pia karte haiN jin peh sachchaai ke asraar khula karte haiN SaaHib-e-ishq bhi kia haiN? keh haiN biphre darya kood paRte haiN, gHaRhaa rahnumaa karte haiN chaah ke raaste dushvaar bohat haiN piare har qadam aable aur khaar mila karte haiN khhgar-e-jour ke lab par hai yahi Harf-e-du'aa "un se Allah bachaaYe jo wafaa karte haiN" deep jalte haiN shab-e-hijr tiri yaadooN ke dasht-e-miZgaaN meiN sitaare se rahaa karte haiN chashm-e-veeraaN meiN tHharti hai jo tasveer tiri ham udaasi se baghalgeer hu'aa karte haiN khoob haiN ham peh inaayaat HaseenooN ki Riaz ik nayaa dard nayaa sooz ataa karte haiN

  Back to top

#7 — Tanwiruddin Ahmad Phool Dil mein baste hain magar door raha karte hain Wadi-e-khaab mein ham un se mila karte hain Loag kuchh aeise hain fitrat se hain apni majboor Jane kis baat pa hangama bapa karte hain Jin ka shewa hi hasad aur takabbur thahra Apni hi aag mein har dam woh jala karte hain Ahl-e-Koofa ki tarah ab huwa andaz-e-wafa Un se Allah bachae jo wafa karte hain Haich nazron mein hain barsaat ke kaale baadal Ham to nazzara-e-gaisu-e-dota karte hain Nafrat-o-bughz-o-taassub ko hawa mat daina Aag bone se to shole hi uga karte hain Darguzar woh na kare to ho guzara kaise? Phool ham loag to din raat khata karte hain

  Back to top

#8 — Muhammad Usman Qaiser Ahl-e-dil jab kabi fursat main rahaa kartey hain Sajda-e-ehque basad showque adaa kartey hain Talkhi-e-zist ko sah kar jo hansa kartey hain Mushkilain apni khod aasaan kiya kartey hain Sonp detey hain nayee nasl ko tanwir-e-hayaat Zaat mian apni woh khurshid huaa kartey hain Aanddiyaan taak main rahti hain boojaney ke liye jab bhee rowshan sar-e-dahleez diya kartey hain Kartey rehtey hain jo tameer khayaaloon main mahal Woh sadaa khab ki dunya main rahaa kartey hain Thani hai jashn manaaney ki khoda khair karey Jab bi kosh hotey hain woh zakhm ataa kartey hain Loag kahlatey hain jab khod ko mohazzab "Qaisar"! phir lahoo kis liye rahoo main bahaa kartey hain

  Back to top

#9 — Yasir Farooq Yasir Paas aate nahiN anjaan bana karte haiN Hum jinhaiN door se pehchaan liya karte haiN Mausam-e-sharm mere dil ko bhla lagta hai Wo mere saamne aa aa ke chuhpa karte haiN Jab ye dastoor hai patther nahiN sunte kuch bhi Jane kiya chooch ke ushShaaq gila karte haiN Hai siyah shaal pe qudrat ki kasheeda kari Shab Falak! tujh pe sitaray ye saja karte haiN Katba-e-qabr pe likkah hai ye muzter misra "Un se Allah bachaey jo wafa karte haiN" Dasht ka dasht tasawwur maiN liye phirte haiN Yaad-perwer kabhi aabaad howa karte haiN? Paa-e-Qudrat hamaiN jab chaHey kuchal de ga Hum yahaN naml ki manind chala karte haiN Ab nae tarz se Sayyad ne ghaira hai hamaiN Qaid aqDaar ke pinjre maiN kiya karte haiN Aah! is ahd ke mujboor-o-ghareeb-o-bekas MaiN ne dekha hai ke merne ki dua karte haiN Saath Yasir liye phirte haiN Kaman-e-Aql Ishq ke teer bhla aSe chala karte haiN?

  Back to top

#10 — Jhony Penta Tashna Ahmedabadi hum se puchey na koi aaj kii kyaa karte haiN hai yakiiN karte hai jo kuch bhi,bajaa karte haiN un se Allah bqchaaYe jo wafaa karte haiN jo bhi ye kehte haiN, wo log khataa karte haiN kyaa ajab daur hai ki log dagaa karte haiN zulm mazloom pe, bekas pe jafaa karte haiN na bukaa karte haiN, harjiz na giilaa karte haiN hum tau faakoN meN bhi bas shukr e khudaa karte haiN wo koi aur hai shabnam se jalaa karte haiN hum tau sholoN pe bhi haNs haNs ke chalaa karte haiN haq pe jaaN dete hai baatil se laRhaa karte haiN hum Ali waale kahaaN kis se daraa karte haiN gham meN shabbir ke rotey hai bukaa karte haiN jaam kausar ke yuN 'tashna' ko milaa karte haiN

  Back to top

#11 — Shehzad Hanif Tang aa jaain tou woh hamsey kaha kartey hein "unsey Allah bachaye jo wafaa kartey hain" raat aur din key sulagney ka hey yaara kis kou teri yaadon mein tou ham jesey jala kartey hain bas isi dil key na sill paye charagar tujh sey yeh alag bat key sab chak silaa kartey hain giran na guzrey yeh ahat sama'aton pey kaheen ham us gali mien dabey paoon chala kartey hein khizr si umr key talib tou buhat sey hongey ham apney wastey marney ki dua kartey hein bheer to hogi waan, masjid ho ya pari-khana kochaa-e-yaar mein dewanay phira kartey hein aik pall key leeay ham ko gawara nahi "shaz" suna hey log to ikk umr jya kartey hein

  Back to top

Previous Winners

Copyright © 1998-2007. Mehfil-e-Mushaira. All rights reserved.